Khwab Mein Dant Ka Tootna Tabeer in Urdu

حضرت امام جعفر صادق ؒ کے بقول خواب میں دانت دیکھنے کی  چھ وجوہات ہیں۔1۔مال۔2۔جدائی ۔3۔رشتہ دار۔4۔منافع۔5۔غم ۔ 6۔نقصان. انسانی وجود میں دانت بہت اہم جزو ہے. جن سے ہم کھاناچباتے اور ہضم کرتے ہیں۔اگر دانت تکلیف میں ہوتو پورا وجود بے حد تکلیف برداشت کرتاہے. اس اعتبارسے دانت کوخواب میں دیکھنا بھی خاصا اہم اور قابل غور وفکر ہے. اکثر علماءِ تعبیر نے دانت کو اہل بیت یاخاندان سے تعبیر کیایے۔

اس حوالے سے حضرت دانیال علیہ السلام کاقول واضح ہےکہ دانت اہل بیت یعنی خاندان کی علامت ہیں. اوپر کے دانت خاندان کے مردوں اور نیچے کے دانت خواتین کی علامت ہیں. سامنے والے دانت باپ بھائیوں بیٹوں جبکہ پہلوکے دانت چچا،چچازاد کی دلیل ہیں۔دیگر دانت دور کے رشتہ داروں کی علامت ہیں۔حضرت ابراہیم کرمانیؒ نے لکھاہے کہ دائیں آنکھ کے مقابل اوپر کے دانت نر اولاد اور نیچے کے مادہ اولاد کی علامت ہیں۔جبکہ بعض دیگر اہل تعبیر نے دائیں طرف کے اگلے دانتوں کو باپ اور اس کی نسبت کے رشتوں سے نسبت دی ہے۔اوربائیں طرف کے دانتوں کو ماں اور اس کی نسبت کے رشتوں کی دلیل بیان کیاہے۔

اگر کوئی خواب میں سامنے والے دانت ہلتے دیکھے . تو اسی نسبت كے رشتہ داروں میں کسی کی بیماری کی علامت ہے . اور اگر خواب میں سامنے كے دانت تعداد میں زیادہ نظرآئیں . تو امکان غالب ہے كے ان قریبی رشتوں میں کوئی بڑی خوشی ہوگی۔

اگردیکھے کہ دانتوں کے پہلومیں نیادانت اُگا ہے۔ اگر اوپرہے توبیٹے کی نوید ہے۔اور اگر نیچے ہے تو لڑکی پیداہوگی۔اگردیکھے کہ کوئی دانت اکھاڑا ہے تو علامت ہے کہ انہی رشتوں میں سے کسی سے قطع تعلقی پیداہوگی. اگر دیکھے کہ تمام دانت گرے اور دوبارہ ظاہرہوگئے۔تو اہل وعیال کی ہلاکت کی دلیل ہے۔
اگردیکھے اس کے دانت ہتھیلی یاجھولی میں گرے ہیں۔تو خاندان میں برکت کی دلیل ہے. اور علامت ہے کہ خاندان کویکجا اور متحد رکھے گا۔ اگردانتوں سے خوشبو دیکھے توعلامت ہے رشتہ داروں میں عزت پائے گا۔اور تعریف سے یاد کیاجائے گا۔اگر بدبودیکھے تو اس کے الٹ تعبیر ہوگی۔اگردیکھے کہ تمام دانت نیچے کی طرف ہیں۔اگر اہل اصلاح ہے تو نیکی اور خیر کی علامت ہے۔اگر اہل شر میں سے ہے تو تعبیر الٹ ہوگی۔ اگردیکھے کہ اس کے دانت چاندی،کانچ یاٹھیکری کے ہیں۔تو اس کی ہلاکت پردلیل ہے۔

اگردیکھے کہ دانت درد کرتے ہیں۔تو یہ غم واندوہ کی دلیل ہے۔اگر دیکھے کہ دانت زرد ہوگیاہے. تو اسی نسبت کے رشتہ داروں میں کوئی بیمار ہوگا. دانت کوسیاہ دیکھے توعلامت ہے کہ تکلیف پہنچے گی۔اگر دیکھے کہ سب دانت گرگئے اور منہ میں پتھر رکھاہے. توعلامت ہےکہ لمبی عمر پائے گا۔اور زیادہ رشتہ دار اس کے سامنے وفات پائیں گے۔
حضرت جابر مغربی ؒ نے فرمایاکہ اگر دیکھے کہ دانت میں درد ہے اور اسے اپنے ہاتھ سے اکھاڑ کرپکڑا ہے۔توتعبیر ہے کہ بہت سامال ملے گا۔ اگردیکھے کہ اس کے دانت ظاہر ہوگئے ہیں۔علامت ہے کہ اس کے رشتہ دار سفر سے بخیریت واپس آئیں گے۔اگر دیکھے کہ اس کے سارے دانت زبان کے درمیان جمع ہوئے اور پھراپنی جگہ چلے گئے ہیں۔تو علامت ہے کہ اپنے قریبی رشتوں سے شک میں پڑے گا۔

خواب میں دانت کے ٹوٹنے یاگرنے کی مختلف اہل تعبیر نے الگ الگ تعبیرات پیش کی ہیں۔ بعض کے نزدیک جھگڑے اور فساد کی علامت ہے۔اور بعض اسے قرض کی ادائیگی کی علامت قرار دیتے ہیں۔

اگردیکھے کہ کسی دوسرے کے دانتوں سے خون نکل رہاہے۔اور انہیں دونوں ہاتھوں سے پکڑاہے تو وہ شخص اِس سے نفع اٹھائے گا۔مگر یہ خود تکلیف بھگتے گا۔

اگردیکھے کہ اس کے سامنے کے دانت ٹوٹ کر ہتھیلی یا گود یازمین پر گرے ہیں۔اور خاک آلود نہیں ہوئے۔علامت ہے کہ اس کا بیٹا،بہن یابھائی پیدا ہوگا۔اگر خاک آلود ہوجائیں۔توعلامت ہے کہ اس کے انہی رشتوں میں سے کوئی مرے گا۔
اگردیکھے کہ سامنے کے دانت کوفتہ ہوئے ہیں۔تو انہی رشتوں سے دشمنی پیداہوگی۔

خواب میں دانتوں کی سفیدی کوحضرت دانیال علیہ السلام نے خاندان کی بزرگی اور رتبہ کی نشانی قرار دیاہے

خواب میں دانت کے گرنے کی مختلف تعبیرات دانت کے مقام کے مطابق پیش کی جاتی ہیں۔علامہ ابن سیرینؒ سمیت تمام بڑے علماء تعبیر نے اوپر کے دانتوں کو قریب کے رشتہ داروں سے تشبیہہ دی ہے۔جبکہ نچلے دانتوں کو دور کے رشتہ داروں سے۔پھر اوپر کے دانتوں میں بھی دائیں آنکھ کے نیچے والے دانت مرد رشتہ داروں اور بائیں آنکھ والے دانت عورت رشتہ داروں کی علامت بتائے گئے۔ اور بالعموم یہی تعبیر پیش کی جاتی ہے کہ اگردانت گود یاہتھیلی پر گراہے تواسی نسبت کے رشتہ کی پیدائش ہوگی۔اور اگردانت زمین پرگر کرخاک آلود ہواتو اسی نسبت کے کسی رشتہ کی موت یا جدائی کی علامت ہوتاہے۔

خواب میں چمکدار سونے یا ہاتھی دانت  سے بنے دانت دیکھنا ایک اچھا شگون ہے۔اور ممکنہ طور پر مستقبل میں خوشحالی اور معاشی استحکام کی علامت سمجھاجاتاہے۔

خواب میں بچے کے دانت اپنے مقام پر چمکدار حالت میں دیکھے۔تویہ بچے کے روشن اور پاکیزہ مستقبل کی علامت ہے۔اگر کوئی دانت ٹوٹا ہوا دیکھا۔تو ممکنہ طور پریہ بچے کی صلاحیتوں میں کسی کمی اور کمزوری کی علامت ہوسکتاہے